Prishtinë: Suspendohen tre inspektorë të ndërtimit

nga elbasi.. Wed Dec 02, 2009 3:17 pm

Kryetari i Prishtinës, Isa Mustafa, ka urdhëruar suspendimin e dy inspektorëve dhe një referenti të ndërtimit, në kuadër të Drejtorisë së Planifikimin, Kadastrit dhe Mbrojtjes së Mjedisit. Inspektorët e suspenduar Ilaz Vokrri, Bajram Ismajli dhe referenti Xhemshit Hertica, janë njoftuar zyrtarisht për suspendimin e tyre.

Suspendimi ka pasuar pas verifikimit të një Komisioni i caktuar nga udhëheqja komunale për të bërë inspektimin e ndërtimeve pa leje gjatë tetorit dhe nëntorit të këtij viti. Komisioni gjatë punës së tij në terren ka konstatuar se gjatë dy muajve të fundit në terrenet ku janë mbuluar nga tre inspektorë janë evidentuar rreth 40 ndërtime pa leje në fazat fillestare, ndërsa tre inspektorët nuk kanë ndërmarrë masat e duhura sipas ligjit për parandalimin e këtyre ndërtimeve.
Udhëheqja e komunës së Prishtinës është e zotuar të ndërmarrë masa të ashpra ndaj çdo punonjësi komunal të cilët nuk i përmbushin detyrat sipas përshkrimit të vendit të punës, njofton Zyra për informim pranë KK Prishtinë.