Vihet gurthemeli i Shtëpisë të Teatrit, Operës dhe të Baletit “Dr Ibrahim Rugova”

nga elbasi.. Wed Dec 02, 2009 3:11 pm

Krerët e shtetit sot kanë marrë pjesë në ceremoninë shtetërore të aktit solemn të vënies së gurthemelit të Shtëpisë së Teatrit, Baletit dhe Operës që do të mbajë emrin e ish presidentit Ibrahim Rugova, ndërtimi i së cilës filloi pikërisht në 65 vjetorin e lindjes së tij

Presidenti i vendit, Fatmir Sejdiu e vlerësoi ndërtimin e Shtëpisë së Teatrit, Operës dhe Baletit, një përkushtim që duhet realizuar sepse ishte edhe projekt i ish presidentit Rugova , emrin e të cilit do ta mbaj ky institucion, që sipas presidentit Sejdiu është një përkushtim e realizimit të amanetit të tij.

“Shtëpia e Teatrit, Operës dhe Baletit shënon kulmin e pjekurisë edhe kulturore edhe shtetërore të vendit, andaj përkushtimi për të bërë këtë objekt, që ka qenë edhe projekt i presidentit Rugova, shënon një hap të rëndësishëm të përmbylljes të asaj pjese të peripecive dhe për të lëvizur shpejt”, ka thënë presidenti Sejdiu.

Edhe kryeministri i Kosovës Hashim Thaçi e vlerësoi këtë ditë të veçantë, për të cilën tha ai se kemi investuar të gjithë për të arritur që edhe ne si shtet të fillojmë të investojmë në ndërtimin e institucioneve e kulturore.

“Sot jam i nderuar që marrim pjesë bashkërisht në vënien e gurthemelit, një shtëpi kjo e munguar në Kosovë, por që i kushtohet sakrificës së qytetarëve tanë dhe vizionit tonë për të ardhmen euroatlantike”, ka thënë kryeministri Thaçi.
Ministri i Kulturës, Rinisë dhe Sporteve, Valton Beqiri, i siguroi artistët se ministria që ai drejton do të angazhohet për kthimin e dinjitetit të tyre artistik dhe profesional.

“Ndërtimi i kësaj shtëpie të madhe do t’ i ndihmojë tri mediume të fuqishme artistike, teatrin, operën dhe baletin, që janë personifikim i drejtpërdrejt i shtetësisë së Kosovës”, ka theksuar ministri Beqiri.

Në nderim të 65 vjetorit të lindjes së presidentit Ibrahim Rugova, presidenti Sejdiu me bashkëpunëtorë bëri homazhe tek varri i tij. Sejdiu tha se presidenti Rugova po i mungon shumë Kosovës, sepse ai është njeriu që bëri epokë në zhvillimet më të rëndësishme për vendin. Tek varri i ish presidentit Rugova kanë bërë homazhe edhe kryetari i Prishtinës Isa Mustafa dhe zyrtarë të tjerë të LDK-së.