U prezantuan rezultatet e projektit të politikës lokale në komunitetet multietnike

nga elbasi.. Wed Dec 02, 2009 8:50 am

Në Qendrën Mediale në Çagllavicë u prezantuan rezultatet e projektit të politikës lokale në komunitetet multietnike për komunën Obiliq, Gjilan dhe Prizren. Rekomandimet do t’iu dërgohen institucioneve të Kosovës me qëllim të përmirësimit të jetës së pakicave në Kosovë

Në Kosovë duhet të ketë forcim të autoriteteve lokale në mënyrë që të mbrohen të drejtat e njeriut. Ky ishte një prej rekomandimeve të një hulumtimi rreth qeverisjes lokale në komunat shumetnike të paraqitura nga KIPRED-i dhe Qendra për Rajonalizim nga Novi Sadi.

Aleksandar Popov nga Qendra për Rajonalizim në Novi Sad iu rekomandoi institucioneve kosovare që në komunat shumetnike të dihen saktësisht cilat janë gjuhët zyrtare, të ketë planprograme mësimore për serbët dhe komunitetet tjera dhe të ketë punësim racional për qytetarët e komuniteteve.

“Në shpresojmë se këto rekomandime do të jenë shfrytëzueshme nga institucionet për komunat multietnike, e po ashtu edhe për shoqërinë kosovare në përgjithësi, pasi që mund të paraprijnë në rregullimin edhe më të mirë të mbrojtjes së të drejtave të pakicave dhe marrëdhënieve ndëretnike, pasi që rregullimi këtyre marrëdhënieve është jetik për stabilitet ndëretnik”, ka thënë Alekasndar Popov.

Mirëpo, Sazan Ibrahimi, drejtor i Asociacionit të Komunave të Kosovës tha se ky hulumtim kontribuon në përmirësimin e qeverisjes lokale, por dha vërejtje se është bërë në kohën e rregulloreve të UNMIK-ut.

“Pas zgjedhjeve të vitit 2007 komunat në Kosovë kanë vepruar në bazë të rregullores së UNMIK-ut. Pastaj ka hyrë në fuqi Ligji mbi qeverisjen lokale dhe mendoj se disa nga këto rekomandime kanë dal si pasojë e asaj faze tranzitore, derisa ka filluar implementimi i Ligjit mbi vetëqeverisje lokale”, ka sqaruar Sazan Ibrahimi.

Ndërsa, zyrtari i Ministrisë së Pushtetit Lokal, Samet Dalipi, premtoi se këto rekomandime do të shqyrtohen me kujdes.

“Rekomandimet të cilat sot u paraqitën, do të shqyrtohen dhe mundësisht të futën në politikat e ministrisë, me qëllim të realizimit të misionit të saj”, ka theksuar Sami Dalipi.

Një hulumtim i njëjtë sikur në Obiliq, Gjilan e Prizren, së shpejti do të bëhet edhe në Pejë, Kamenicë edhe Rahovec.