PDK i kërkon Dacit të distancohet nga veprimet e deputetëve Salihaj e Geci

nga elbasi.. Wed Dec 02, 2009 8:47 am

Partia Demokratike e Kosovës kërkoi sot nga kreu i LDD-së, Nexhat Daci, që të distancohet nga veprimet e deputetëve Adem Salihaj dhe Gani Geci dhe nëse është e nevojshme të kërkojë dorëheqjet e tyre. Zëdhënësi i PDK-së, Blerand Stavileci, tha se u pa qartë se nuk ka asgjë të vërtetë në deklarimet e tyre, përpos qëllimeve politike.

“Është e qartë se veprimet e ditëve të fundit të dy deputetëve të LDD-së, po bëhen për qëllime politike. Nuk ka asnjë dromcë të vërtete në gjithë atë që ata thonë. Veprimet e tilla e dëmtojnë imazhin e Kosovës në bashkësinë ndërkombëtare, dhe, në Kosovë nuk ka vend për lojëra të tilla të ulëta. I bëjmë thirrje kreut të LDD-së, Nexhat Daci, që të distancohet nga deklaratat e bëra nga Salihaj dhe Geci dhe që të kërkoj përgjegjësi nga ta. Nëse është e nevojshme, Daci duhet të kërkojë edhe dorëheqjet e tyre. Kjo është e turpshme. Po të kishin vetëm pak dinjitet, Geci dhe Salihaj do të jepnin dorëheqje pa ju thënë askush”, ka thënë zëdhënësi i PDK-së, Blerand Stavileci.