Vaksinat dedikuar personelit mjekësor do t’iu shpërndahen kategorive të tjera

nga elbasi.. Mon Nov 30, 2009 7:37 am

Deri më tani në Kosovë janë konfirmuar 7 raste të vdekjes nga Gripi H1N1, ndërkohë që edhe për 3 raste të tjera priten analizat shtesë, thonë zyrtarët e Ministrisë së Shëndetësisë, të cilët shtojnë se nëse deri në fund të kësaj jave mjekët në Kosovë nuk i marrin vaksinat e dedikuara për ta, ato do t’iu shpërndahen kategorive të tjera meqenëse ka shumë të interesuar që të marrin vaksinat

Në kohën kur në botë Gripi A H1N1 ka shkaktuar rreth 6 mijë të vdekur dhe kur rastet e konfirmuara në nivel botëror janë rreth 600 mijë, në Kosovë deri tash janë konfirmuar 146 raste pozitive të këtij Gripi, që në përpjesëtim me numrin e popullsisë, janë shifra të përafërta me ato të vendeve të rajonit.

Krahas vaksinës për gripin e derrave, Ministria e Shëndetësisë ka siguruar edhe 18 mijë doza të tjera të gripit sezonal, të cilat që nga sot jepen në shtëpitë e shëndetit.

Sipas analizave të deritanishme të Ministrisë së Shëndetësisë, rreth 70 për qind të rasteve të Gripit A H1N1 janë nga regjioni i Prishtinës, ndërkohë që të gjitha rastet e vdekjeve iu takojnë regjioneve të tjera. Kjo çon kah përfundimi se në Prishtinë, pavarësisht se ka pasur më shumë raste, ato janë lajmëruar më shpejt te mjeku dhe i kanë shpëtuar më të keqes, derisa kjo nuk mund të thuhet për rajonet e tjera, për çka zyrtarët e Ministrisë së Shëndetësisë apelojnë edhe një herë tek popullata që të lajmërohen menjëherë tek mjeku posa të kenë temperaturë mbi 38 gradë.