Kosova kërkon përkrahje për liberalizimin e vizave me BE

nga elbasi.. Mon Nov 30, 2009 7:35 am

Në prag të takimit të radhës të Ministrave të Drejtësisë dhe Punëve të Brendshme të vendeve anëtare të Bashkimit Evropian, ministri i Punëve të Brendshme i Republikës së Kosovës, Zenun Pajaziti u ka kërkuar përkrahje konkrete homologëve të tij evropian, rreth përfshirjes së Kosovës në dialogun për liberalizim të vizave me BE-në.

Në letrën e adresuar ministrave të BE-së të Drejtësisë dhe Punëve të Brendshme, ministri Pajaziti ka kërkuar që Kosovës t’i ofrohet proces i njëjtë si vendeve të tjera të Ballkanit Perëndimor dhe që Kosova të trajtohet njëjtë si shtetet tjera të rajonit. Më tutje, ministri Pajaziti ka kërkuar përkrahje në ofrimin e Udhërrëfyesit për liberalizimin e vizave me BE-në, ngjashëm me shtetet tjera të rajonit. Letra është dërguar javën e kaluar në prag të takimit të Këshillit për Drejtësi dhe Punë të Brendshme i BE-së, ku pritet që aprovohet rregullorja e Këshillit e cila e amandamenton rregulloren (EC) nr 539/2001 që liston shtetet e treta, shtetasit e të cilëve duhet të posedojnë viza kur të kalojnë kufirin e jashtëm të BE-së dhe shtetasit të cilët janë të liruar nga këto kërkesa. Ky takim mbahet sot më 30 nëntor dhe më 1 dhjetor në Bruksel dhe ka rëndësi të madhe, pasi që me rastin e aprovimit të rregullores së lartpërmendur, shtetasit e disa shteteve të rajonit do të kenë mundësi të udhëtojnë pa viza në vendet e BE-së prej 19 dhjetorit.