U mbajt takimi i dytë FIFA-FFK

nga elbasi.. Fri Nov 27, 2009 3:53 am

Sot në selinë e FIFA-s në Cyrih është realizuar takimi i radhës ndërmjet krerëve të Federatës së Futbollit të Kosovës (FFK) dhe atyre të Federatës Ndërkombëtare të Futbollit (FIFA)....

Delegacioni i FFK-së i përbërë nga kryetari Fadil Vokrri, sekretari i përgjithshëm Eroll Salihu dhe eksperti ligjor Haki Demolli janë pritur nga sekretari i përgjithshëm i FIFA-s, Zherom Valke, nënkryetari i FIFA-s, Xhefri Thompson, drejtori ligjor Marko Vilinger dhe këshilltari i Blaterit dhe drejtori për marrëdhënie ndërkombëtare Zherom Shampanj si dhe Tierri Regent ndihmës i sekretarit të përgjithshëm. Me këtë rast, krerët e FFK-së i dorëzuan krerëve të FIFA-s një dokumentacion voluminoz, ashtu siç ishte kërkuar nga takimi i 5 nëntorit, me dëshmi të bollshme mbi mëvetësinë e Federatës së Futbollit të Kosovës qysh në ish-shtetin tashmë të shpërbërë të Jugosllavisë dhe një sërë dokumentesh tjerë që tregojnë se FFK-ja ka një traditë dhe si e tillë do të duhej të ishte pjesë e mekanizmave ndërkombëtarë. Në takim është biseduar edhe për të gjitha çështjet tjera që ishin temë edhe në takimin e parë, duke marrë premtimin e delegacionit të FIFA-s, se të gjitha këto pika dhe kërkesat e FFK-së, do t’i procedohen për shqyrtim Komitetit Ekzekutiv të FIFA-s në mbledhjen e radhës që mbahet në fillim të dhjetorit në Kejptaun, premtim ky që doli edhe nga takimi i 5 nëntorit. Të dyja palët janë pajtuar që të vazhdohet bashkëpunimi dhe shkëmbimi i informatave ndërmjet FFK-së dhe FIFA-s si dhe të mbahen edhe më shumë takime në të ardhmen deri në përmbushjen e synimeve të FFK-së për anëtarësim të plotë në FIFA dhe UEFA.