Mesazhe urimi për festën e Kurban Bajramit

nga *lissa* Thu Nov 26, 2009 1:08 pm

Kryetari i Bashkësisë Islame të Kosovës, myftiu Naim Tërnava, me rastin e Kurban Bajramit nëpërmjet një mesazhi ka uruar festën e Kurban Bajramit dhe Festën e Flamurit me dëshirat më të mira për shëndetin dhe lumturinë e të gjithë besimtarëve dhe të familjeve të tyre.

Mesazhe urimi për festën e Kurban Bajramit F.1126154832422_m

Mesazhe urimi për festën e Kurban Bajramit F.1126154832422_m

Kreu i Bashkësisë Islame të Kosovës porosit qytetarët që të ruajnë vlerat fetare e kombëtare, të ndihmojnë njëri tjetrin, të punojnë për një të ardhme sa më të mirë të vendit tonë, që interesi i përgjithshëm i vendit të jetë mbi interesat e ngushta personale, t'u shtrijnë dorën e ndihmës të gjithë atyre që kanë nevojë.

Edhe krerët e institucioneve më të larta të vendit si dhe partitë politike kanë uruar myftiun Tërnava dhe të gjithë besimtarët islamë me rastin e festës së Kurban Bajramit.
Presidenti i Republikës së Kosovës, Fatmir Sejdiu ka thënë se kjo festë forcon besimin në Zotin, mirëkuptimin, nderimin dhe dashurinë në mes njerëzve.
“Me këtë rast, në këtë prag feste, dua të rikujtoj se Republika e Kosovës, duke qenë një vend i tolerancës dhe i bashkëjetesës së shkëlqyeshme të qytetarëve që u përkasin etnive dhe besimeve të ndryshme, reflekton një kulturë të jashtëzakonshme fetare, të cilën e gjithë bota e çmon si një pasuri të veçantë të vendit tonë. Le të punojmë të gjithë së bashku me tërë dijen dhe vullnetin tonë të mirë që ky vlerësim i lartë të mos zbehet asnjëherë!”, thekson ndër të tjera presidenti Sejdiu.
Në urimin e tij, kryetari i Kuvendi të Kosovës Jakup Krasniqi thekson se “kjo kremte këtë vit koincidon me festën e Flamurit dhe uroj që të dyja të kalojnë në frymë gëzimi, hareje e solidariteti”.

Ndërkaq në urimin e tij, kryeministri Hashim Thaçi thotë se Kurban-Bajrami “ngjall ndjenjën e përkushtimit dhe të sakrificës për të mirën e njerëzimit, nevojën shpirtërore të lartësimit moral dhe të kultivimit të vlerave të larta në shoqëri”.

“Le të jetë kjo festë e madhe edhe një rast për të shpalosur edhe më thellë ndjenjat e dashurisë, respektit, harmonisë dhe vullnetit të mirë të qytetarëve tanë”, thekson Thaçi dhe uron që ditët e Kurban Bajramit në të gjitha familjet të sjellin më shumë lumturi, paqe dhe mbarësi.