Identiteti i myslimanit

nga jetaaa Wed Sep 23, 2009 4:58 pm

Falënderimi i takon Alalhut, Zotit të botërave. Paqja dhe shpëtimi qoftë mbi të Dërguarin e Allahut, mëshirën e mbarë njerëzimit.

Ata që u bindën dhe ndoqën Rrugën e Drejtë, kërkuan dritën e të Vërtetës Hyjnore, këta pasqyruan humanizmin, sjelljen, barazinë dhe stabilitetin për të cilën edhe janë krijuar dhe jetojnë. Allahu i Lartësuar thotë: "Dhe Unë (Allahu) nuk i krijova xhinët dhe njerëzit, veçse që ata duhet të më adhurojnë vetëm Mua". (Dharijat, 56) Këta njerëz adhuruan Allahun ashtu si deshi Ai dhe këta janë grupi i shkëlqyer dhe bujar.

Këta shtegtarë që janë duke shtegtuar me të Vërtetën në të vërtetë, janë myslimanët. Islami i tyre është feja e Allahut të Lartësuar, e shpallur te të gjithë Pejgamberët, po në këtë rrugë ecën edhe të sinqertët me përkushtim. Të gjithë të dërguarit e Allahut ishin myslimanë, po edhe bijtë e tyre si dhe pasuesit i porositën që të përfundojnë me Islam. Ibrahimi dhe Ismaili, duke ngritur muret e Qabes, luteshin: "Zoti ynë! Bëna ne të nënshtruar ndaj Teje (bëna myslimanë) edhe pasardhësit tanë një popull mysliman (të nënshtruar ndaj Teje)"; (Bekare, 128). Jusufi biri i Jakubit ruan porosinë e prindërve dhe i lutet Allahut të Lartësuar që të vdes në Islam: "Më bëj mua që të vdes Mysliman (si një i nënshtruar Vullnetit Tënd) dhe më bashko me të drejtët". (Jusuf, 101).

Të gjithë këta që udhëtuan gjatë kohërave me Dritën e Krijuesit ishin myslimanë që nuk iu përulën rrethanave të kohës, nuk u mbështetën vetëm në mendjet e tyre por vazhduan me Dritën e udhëzimit dhe ndriçuan mendjet dhe zemrat. Këta janë të dalluar në botën e njerëzimit me veçori dhe cilësi të qarta, apo me shprehje tjera ata kanë identitet dhe personalitet të caktuar dhe të përsosur. Të dërguarit e Allahut, Pejgamberët, pasuesit e tyre i gjejmë të vetmit që përfaqësojnë Islamin me besnikëri dhe sinqeritet.

Personaliteti Islam gjatë shekujve

Identiteti i myslimanit gjatë shekujve përjetoi agresione dhe sulme nga më të ndryshmet, qëllimi ishte asgjësimi dhe eliminimi i tij. Tiparet e agresionit ishin të llojllojta, armiqtë e Islamit promovuan dyshime duke paraqitur filozofi dhe kultura të ndryshme, kështu këto depërtuan në masë dhe koncepti e nocioni Islam u njollos.

Është e vërtetë që sot identiteti i myslimanit nuk paraqitet dhe përfaqësohet në kushtet dhe nevojat reale dhe ashtu siç kërkohet në të vërtetë. Për këtë është nevoja që të riparaqiten sërish shtyllat drejtuese të personalitetit Islam. Asgjë tjetër, vetëm identitetin që përfaqësuan të dërguarit e Allahut të Lartësuar, sahabët e ndershëm dhe dijetarët e mirënjohur Islamë. Pra, referencë për formimin e identitetit të mirëfilltë janë të parët tanë, që për bazë kishin Librin e Allahut dhe sunnetin e Muhamedit, salAllahu alejhi ue selem.

Në vazhdim do të veçojmë dy nga shtyllat bazë që shërbejnë për pikënisje.

Ngjyrosja me fenë e Allahut të Lartësuar.

Allahu i Lartësuar thotë: "(Feja e Besimi ynë, Sibgati – ngjyrosja - ynë) është Sibgati i Allahut (Feja e Tij, Islami) dhe cila fe (besim, Sibgah) mund të jetë më e mirë se e Allahut?"(Bekare, 138). Feja e tij është Islami më të cilën myslimani ngjyros bindjet, mendimet, ndjenjat, konceptet, qëllimet, sjelljet dhe veprimet.

Myslimani veçohet me këtë ngjyrosje Hyjnore duke iu nënshtruar të gjitha rregullave dhe ligjeve Islame dhe duke e pranuar atë si tërësi: "O ju që besuat, hyni në islamin e tërësishëm (përqafojeni fenë islame në tërësi), e mos ndiqni rrugën e djallit, sepse ai është armik juaji i hapët". (Bekare, 2008)

Kjo realizohet mbi këto baza:

- Njohja e islamit mbi bazën e Kur’anit dhe sunnetit;

- Njëshmëria e udhëzimit është vetëm nga Allahu i Lartësuar.

- Veprimi që duhet të shoqërojë bindjen.

- Thirrja në udhëzimin e Allahut të Lartësuar.

- Edukimi mbi parimet bazë të Islamit.

Vizioni dhe largpamësia.

Myslimani që është udhëzuar me Udhëzimin Hyjnor, ka fituar dhuratë dritën e mendjemprehtësisë. Allahu i Lartësuar thotë: "Allahu është Valiu (Mbrojtësi, Ruajtësi) i atyre që e besojnë Atë. Ai i nxjerr ata nga errësira në dritë, por sa për ata që nuk besojnë, Eulija (mbështetës, ndihmues) të tyre janë Tagutët: këta i nxjerrin nga drita dhe i zhysin në errësirë. Këta janë banorët e Zjarrit dhe atje do të banojnë përgjithmonë". (Bekare, 257)

Drita me të cilën jeton myslimani është drita e Allahut me të cilën ndiçon zemrën e robit të Allahut, Ai në kaptinën e dritës, ajeti 35 thotë: "Allahu është drita e qiejve dhe e tokës. Shembulli i Dritës së Tij është si të kishim një kënd të errët dhe në të një llambë, llamba e futur në një kupë qelqi, kupa e qelqit si të ishte yll që shkëlqen i ndezur nga një pemë e bekuar, nga ulliri, as nga lindja (që nuk i merr rrezet vetëm në mëngjes), as nga perëndimi (që nuk i merr rrezet vetëm pasdite, por është nën rrezet e diellit gjatë gjithë ditës), vaji i të cilit digjet vetvetiu edhe pse nuk e ka prekur zjarri fare. Dritë përmbi Dritë! Allahu udhëzon drejt Dritës së Tij atë që do Ai. Allahu sjell shembuj e përngjasime për njerëzimin dhe Allahu është për çdo gjë i Gjithëditur".

Drita e Allahut të Lartësuar prodhon dhe ndërton te myslimani vizionin e mendjemprehtësisë, kështu që myslimani arrin të krijojë një vizion të qartë mbi të vërtetën dhe dallon të vërtetën nga gënjeshtra.

Sot, është më se e nevojshme të mobilizohemi me urtësi dhe mençuri, dhe vetëm në këtë mënyrë mund ta ngrejmë fjalën e Allahut, dhe ta asgjësojmë dhunën e errët që ka përfshirë njerëzimin. Kemi nevojë për maturi dhe pjekuri, që të hartojmë strategjinë e njohjes së miqve dhe armiqve.

Dhe në fund, e lus Allahun e Lartësuar të na dhurojë udhëzim, urtësi, personalitet dhe veprim të drejtë.

Autori: Dr. Omer Sulejman el-ESHKAR

Përktheu dhe përshtati:

Ulvi Fejzullahu