Partitë raportojnë për parregullsi

nga *lissa* Sun Nov 15, 2009 12:21 pm

Vlerësimet për ecurinë e procesit zgjedhor në 36 komuna të Kosovës kanë qenë në masë të madhe pozitive – mirëpo ka pasur edhe reagime nga parti të ndryshme rreth parregullsive ose incidenteve të vogla.

Partitë raportojnë për parregullsi F.1115195317987_m

Partitë raportojnë për parregullsi F.1115195317987_m

Kështu, nënkryetari i PDK-së, Hajredin Kuçi, gjatë konference për media ka thënë se gjatë ditës është regjistruar një incident në Vushtrri, ku është përfshirë kandidati i AAK-së për kryetar të komunës, Muharrem Shabani – i cili sipas Kuçit – “ka cenuar të drejtën e votës”.

“Na vjen keq për një rast që ka ndodhur në Vushtrri, ku është involvuar direkt edhe kandidati i AAK-së për kryetar të komunës. Rasti është i njoftuar edhe në organet e policisë. Mendoj që policia është duke e kryer punën e vet, nuk është diçka që ka cenuar vetëm të drejtën e votës, po është diçka që ka cenuar më shumë, ndaj do ta quaja ligjin, po për këtë ne do t’ia lëmë organeve të drejtësisë që ta thonë fjalën e vet”, ka thënë Kuçi.

I menjëhershëm ka qenë reagimi i Aleancës për Ardhmërinë e Kosovës. Shtabi Qendror Zgjedhor i AAk-së e ka demantuar fuqishëm deklaratën Kuçit, duke thënë se, PDK dhe zyrtarët e saj, duke u munduar t’i maskojnë shkeljet flagrante që po i bëjnë procesit zgjedhor, përmes dhunës, ndërhyrjes direkte në vendvotime me zyrtarë, truproja dhe, madje me forca të policisë, tash duan të shpifin kundër kandidatëve potencialë të AAK-së, të cilët pritet të dalin bindshëm fitues në komunat e tyre, siç është edhe rasti i kandidatit në Vushtri, Muharrem Shabani.

Ndërkaq, Shtabi i Përgjithshëm Zgjedhor i LDK-së, ka dërguar një ankesë në drejtim të KQZ-së për shkak të siç thuhet “disa ndërhyrjeve në proceset e votimit dhe shqetësimeve të qytetarëve në lidhje me praninë e personave të paautorizuar nëpër qendrat e votimit. LDK ka kërkuar zyrtarisht që Komisioni Qendror i Zgjedhjeve të Ndërmarrë masat e duhura për largimin e personave të paautorizuar nga qendrat e votimit anembanë Kosovës, përkatësisht të marrë vendim në lidhje me këtë çështje dhe të urdhërojë Policinë e Kosovës që të zbatojë këtë urdhër.

“Kjo ankesë/kërkesë bëhet me vullnetin për të siguruar një ambient sa më të qetë që qytetarët të votojnë në këtë orë të fundit, pasi vërehet një dalje masive e popullsisë, si dhe procesi i numërimit të votave të garantohet pa praninë e personave të paautorizuar. Në të njëjtën kohë, i kërkojmë KQZ-së që në qendrat ku ka votues edhe pas orës së mbylljes së kutive, përtej orës 19:00, qendrat të qëndrojnë hapur, ashtu siç e parashikon edhe ligji”, thuhet në ankesë.

Ndërkaq Lidhja Demokratike e Dardanisë ka reaguar ndaj parregullsive që, sipas kësaj partie, kanë ngjarë në komunën e Skenderajt.

Sipas kësaj partie, në fshatin Prekaz i Epërm, Partia Demokratike e Kosovës së bashku me Haxhi Bejten kanë mbushur me fletëvotime kutitë që gjendeshin në vendvotimin në Prekaz, e që është në kundërshtim me ligjin për zgjedhjet.

Gjithashtu – sipas degës së LDD-së në Skenderaj, në fshatrat: Qirezë, Turiçevc, Burojë, Açarevë, Kllodernicë, Runik, Vojnikë dhe fshatra të tjerë, vjedhjet kanë qenë shumë të mëdha.