Premtimi

Përmbushja e premtimit është theksuar shumë nga Kur'ani Famëlartë dhe nga Sunneti i Pejgamberit, alejhi selam. Kur'ani Famëlartë i urdhëron pasuesit e vet: "O ju që besuat! Zbatojini premtimet (obligimet)!...!" (Kur'an, 5:1). Në këtë vijë, sipas të Dërguarit të Allahut, alejhi salatu ue selam, thyerja e premtimit është një prej karakteristikave të hipokrizisë. Pra, thyerësi i premtimit do të jetë njëri prej tre njerëzve kundrejt të cilëve Vetë Allahu i Plotfuqishëm do të hakmerret në Ditën e Gjykimit. Pra, një person që s'ka besë, në fakt, s'ka fe.

Më tej, përmbushja e premtimeve është një prej veçorive të sjelljes së të Dërguarve, alejhimu selam. Kur'ani Famëlartë e lavdëron Ismailin, alejhi selam, si mbajtës të premtimit. Gjithashtu, edhe Muhammedi, alejhi selam, pati pritur tri ditë një njeri në një vend që e patën lënë si pikëtakim, i cili i pati premtuar të Dërguarit të Allahut, alejhi selam, që do t'i jepte një gjë.
Aq shumë i është vënë theks përmbushjes së premtimit, saqë, madje, edhe premtimet e të vdekurve duhet të çohen në vend. Sa për të argumentuar, ebu Bekri (Allahu qoftë i kënaqur prej tij!) i cili ishte udhëheqësi i parë i Islamit, pas Pejgamberit, alejhi selam, pati përmbushur një premtim të dhënë nga Pejgamberi, alejhi selam, në kohën kur ky i fundit (pra, Pejgamberi, alejhi selam) pati ndërruar jetë.


Argumente nga Kur'ani

1) "Jo, (nuk është ashtu si thonë ata) po kush e përmbush amanetin e vet (është besnik) dhe ruhet nga mëkatet, s'ka dyshim, Allahu i do ata që ruhen!" (Kur'an, 3: 76).
2) "O ju që besuat! Zbatojini premtimet (obligimet)...!" (Kur'an, 5: 1).
3) "Meqë keni premtuar, zbatojeni, pra, premtimin e dhënë ndaj Allahut, e mos i prishni betimet pasi i keni vërtetuar ato, duke qenë se Allahun e bëtë garant tuajin! Vërtet, Allahu e di se çka punoni!" (Kur'an, 16: 91).
4) "Mos e përdorni pasurinë e jetimit ndryshe vetëm në mënyrë më të mirë (për t'ia shtuar), derisa ai ta arrijë pjekurinë e vet! Premtimin zbatojeni, sepse për premtimin ka përgjegjësi!" (Kur'an, 17: 34).
5) "Përkujtoju në këtë Libër Ismailin! Ai ka qenë shumë besnik në premtim (premtoi të bëhet kurban) dhe i dërguar, pejgamber!" (Kur'an, 19: 54).
6) "Dhe ata të cilët me kujdes i ruajnë ato që u janë besuar (sende ose fjalë), e ruajnë edhe premtimin e dhënë! Dhe ata të cilët i kushtojnë kujdes kohës së namazit të tyre. Të tillët janë mu ata trashëgimtarët, të cilët e trashëgojnë Firdevsin dhe aty ata janë përgjithmonë!" (Kur'an, 19: 54).


Argumente nga Sunneti

1. Abdullah ibën Amër ibën el-Asi (Allahu qoftë i kënaqur prej tij!) rrëfen se Pejgamberi, alejhi selam, ka thënë: "Gjithsecili që posedon katër tipare, është hipokrit i dukshëm dhe kushdo që posedon një prej tyre, posedon karakteristikë të hipokrizisë, derisa t'i shmanget asaj. Ato janë: kur flet, gënjen; kur i besohet diçka, tradhton; kur jep premtim, nuk e mban; dhe kur polemizon, shmanget nga e vërteta (fillon të shajë)!". [Transmeton Buhariu dhe Muslimi]
2. Ebu Said el-Hudri (Allahu qoftë i kënaqur prej tij!) rrëfen se Pejgamberi, alejhi selam, ka thënë: "Gjithsecili që thyen marrëveshje do të ketë një flamur-shenjë në shpinën e tij në Ditën e Gjykimit. Ai (flamuri) do t'i jetë i ngritur në bazë të natyrës së prishjes (së marrëveshjes/jeve). Vini re! Nuk do të ketë thyes më të madh marrëveshjeje apo premtimi sesa udhëheqësi i njerëzve të thjeshtë!". [Transmeton Muslimi]
3. Ebu Hurejra (Allahu qoftë i kënaqur prej tij!) rrëfen se Pejgamberi, alejhi selam, ka thënë: "Allahu i Lartësuar ka thënë: "Në Ditën e Gjykimit Ai do të luftojë kundër tre vetave: ndaj atij që bën marrëveshje në Emrin e Tij dhe mandej e thyen, ndaj atij që shet një njeri të lirë si të ishte skllav e ia asgjëson vlerën dhe ndaj atij që angazhon një punëtor me mëditje dhe nuk ia jep hakun, ndonëse njeriu ia ka kryer punën për të cilën janë marrë vesh!". [Transmeton Buhariu]
4. Enesi (Allahu qoftë i kënaqur prej tij!) tregon: "Rrallë ndodhte që Pejgamberi, alejhi selam, të na takonte e të mos na thonte: "Nuk ka fe ai që nuk ka besë e as ai që nuk e mban fjalën!". [Transmeton Bejhakiu]
5. Xhabiri (Allahu qoftë i kënaqur prej tij!) tregon: "Pas vdekjes së Pejgamberit, alejhi selam, el-Ala ibën el-Hadrami pati ardhur te ebu Bekri, Allahu qoftë i kënaqur me të dytë, dhe ky i fundit tha: "Nëse është dikush të cilit i ka borxh diçka i Dërguari i Allahut ose i është premtuar diçka nga ana e tij, le të vijë te unë!". El-Hadrami i tha: "I Dërguari i Allahut më ka premtuar kaq dhe kaq!", duke i shtrirë krahët tri herë për të treguar më hollësisht. Ndërkaq, ebu Bekri i dha një grusht. Ai i numëroi dhe i dolën pesëqind. Atëherë, ebu Bekri i tha: "Merr edhe dy herë sa aq!". [Transmeton Buhariu dhe Muslimi]
6. Abdullah ibën ebu-l-Hamza (Allahu qoftë i kënaqur prej tij!) pati thënë: "Para se Pejgamberit, alejhi selam, t'i vinte Shpallja, bleva diçka prej tij dhe i mbeta borxh diçka për të cilën i premtova se do t'ia sillja te ai, por pata harruar. Pas tri ditëve, kur m'u kujtua, shkova te ai vendi që u patëm marrë vesh dhe e gjeta atë aty. Ai tha: "Më ke mërzitur; të kam pritur këtu për tri ditë!". [Transmeton ebu Davudi]
7. Abdullah ibën Amri (Allahu qoftë i kënaqur prej tij!) tregon rastin kur nëna e tij pati thirrë, në kohën kur Pejgamberi, alejhi selam, ka qenë në shtëpinë e tyre, duke i thënë: "Eja këtu të të jap diçka!". Ndërkaq, Pejgamberi i Allahut e pati pyetur se çka kishte pasur ndërmend të më japë, e kur ajo i tha se ka pasur ndërmend të më japë ca hurma, atëherë ai i pati thënë: "Nëse nuk do t'i kishe dhënë asgjë, në regjistrin tënd do të ishte shënuar një genjeshtër!". [Transmeton ebu Davudi dhe Bejhakiu]