Ballafaqimi Kelmendi-Vukçeviq

nga *lissa* Fri Nov 13, 2009 10:24 am

Me ftesë të kryetarit të Forumit të Krans Montanës, Jean-Paul Carteron, ministrja e Drejtësisë e Kosovës Nekibe Kelmendi, e shoqëruar nga ambasadori i Kosovës në Francë, Muhamedin Kullashi, mori pjesë në takimin e XI-të të këtij forumi, i cili u mbajt në Paris, ku u diskutua për krimit trans-nacional.

Ballafaqimi Kelmendi-Vukçeviq F.1113160124459_m

Ballafaqimi Kelmendi-Vukçeviq F.1113160124459_m

Para fillimit të sesionit, ministrja Kelmendi u takua me Princin e Litenshtajnit, Nikolaus von Liechtenstein ambasador në Belgjikë dhe në BE, me presidentin e Shqipërisë, Bamir Topi dhe me burrështetas, ministra dhe ambasadorë të vendeve të ndryshme.

Kelmendi mori pjesë në grupin e sesionit të veçantë “grupi i kufizuar”, në të cilin, temë trajtimi ishte "Biznesi dhe krimet e luftës".

Pjesëmarrja në këtë diskutim e ministres Kelmendi – siç thuhet në një komunikatë të Ministrisë së Drejtësisë – ishte kundërpërgjigje në diskutimin e Prokurorit për krime lufte të Serbisë, Vladimir Vukçeviq, i cili si panelistë, tentoi që të pranishmit t’i dezinformonte me deklarata tanimë të njohura, se Serbia ishte viktime e luftës, se ajo ka pësuar dëme të mëdha ekonomike për arsye të sanksioneve të vendosura nga bashkësia ndërkombëtare ndaj saj, dhe se ka shume viktima serbe dhe jo shqiptare të cilat janë zhdukur gjatë luftës në Kosovë.

Duke e shfrytëzuar të drejtën e diskutimit, Kelmendi iu kundërpërgjigj fjalëve të pa vërteta të thëna nga prokuroi serb. Ministrja Kelmendi tha se, Serbia nuk është vend që ka dalë nga lufta, sepse tri luftërat e zhvilluara gjatë viteve 90-ta janë zhvilluar jashtë territorit të Serbisë.

"Serbia nuk është vend që ka dalë nga lufta, sepse tri luftërat në vitet e 90-ta i ka zhvilluar jashtë territorit të saj, kështu që nuk ka pësuar dëme ekonomike. Demin eventual ekonomik që e ka pësuar nga sanksionet e vendosura, janë pasojë e luftërave që Serbia i ka zhvilluar në tri shtetet e dala nga ish-Jugosllavia, prandaj ajo, se pari duhet t’i përmend shkaqet që kane sjell deri të vendosja e sanksioneve, e jo te flet për pasojat nga sanksionet", tha Kelmendi.

Sipas ministres Kelmendi në luftën e fundit në Kosovë, ekonomia kosovare është shkatërruar pothuajse tërësisht. Sipas saj, kriminelet serbe të luftës në Kosovë, janë pasuruar duke plaçkitur pasuritë e familjeve shqiptare si gjate depërtimit në shtete fqinje dhe shtetet e treta, ashtu edhe pas zbrazjes së atyre shtëpive.

Po ashtu ministrja Kelmendi tha se edhe ajo vetë është viktime e luftës, në të cilën luftë forcat speciale serbe ja kanë rrëmbyer dhe me pas ja kanë ekzekutuar bashkëshortin dhe dy djemtë.

Gjatë këtij diskutimi - siç thuhet në komunikatë - ministrja Kelmendi parashtroi disa pyetje për prokurorin serb, por ky i fundit nuk u përgjigj fare.